المشاركات الشائعة

السبت، 7 مايو 2011

اتمرد علي الوضع القائم

   
    ليه لو قررنا نتجوز لازم نجيب كل حاجه  في بيتنا تلاجه وغساله وتليفزيون
 ودش ودي في دي 
والنيش وطربيزه السفره
طيب انا بقي هتجوز من غير نيش
عادي انا من غيره مش صعب اعيش
ومش لازم مهر كبير 
او فرح تحفه وخطير
في حاجات كتير ممكن استغني عنها دلوقت 
واجيبها بعدين
مش هموت لو ما كنش عندي تلاجه من ام بابين
وكمان عادي جدا لو شقتي مش فيها حمامين
وبرده ممكن استحمل الحر ومش اركب تكيفين
ومش لازم اشتري شبكه قنطار دهب انا ممكن ارضي بجرامين
ومش لازم فرحي يبقي يوم الخميس عادي جدا لو بقي الاتنين
مش لازم نقلد بعض فيها ايه لو عملنا اللي احنا عايزينه مش اللي تقليدنا الصعبه بتفرضه علينا
مش لازم اقضي شهر عسل في باريس 
ممكن اسافر اسكندريه او السويس
مش لازم فستان فرحي يبقي غريب وفريد
اهم حاجه يبقي شكله محترم وبرده مش لازم يبقي جديد
مش لازم اعمل بوفيه فيه جريب فروت وباتون ساليه
ممكن يبقي عادي وبسيط وميهمنيش ان حد يتريق عليه
ليه بنحاول نرضي الناس واحنا ناسين نفسينا 
انا ارضي ربي ونفسي وخلاص وربنا هيبارك لينا
انا همشي علي قدي ومش لازم المظاهر
اهم حاجه نيتي وسهل احسن اللي ظاهر
ممكن ابدأ بنفسي واشدك انت معايا
وساعتها هتلاقي نفسك وفرت الف حكايه
ومش لازم نربط السعاده بالفلوس
ياما جيوب عمرانه بس مش فرحانه

هناك تعليقان (2):

  1. عندك حق واللهخ ياسعاد
    بس هتجوز ازاي من غير نيش
    لان دي عاده في بلدنا والناس عندنا بيحكموا علي المركز الاجتماعي عن طريق الحاجات اللي بتجيبها العروسه في شقتها

    ردحذف
  2. انا شايفه اني اهم حاجه اني اكون متفقه مع شريك حياتي علي كل حاجه
    وعادي جدا لو مجبناش حاجات كتير
    ايدي في ايده نتحدي العالم
    ممكن اساسا منعملش فرح لو احنا متفقين علي كده
    واللي بيحاول يرضي الناس هيفضل طول عمره تعبان
    عشان الناس مش بيعجبها حاجه
    اهم حاجه نرضي ربنا وبعدين نفسنا

    ردحذف